طريقة عمل عجينة السمبوسة المقلية زي الجاهزة بالضبط
 |
| طريقة عمل عجينة السمبوسة في البيت زي الجاهزة بالضبط |
اهلا بيكم، النهاردة هنعمل مع بعض طريقة عمل عجينة السمبوسة المقلية زي الجاهزة بالضبط ، مش بس كده لا انت ممكن تحتفظي بيها في الثلاجة فترة طويلة لما تحبي تستخدميها وهتبقي زي الطازة بالضبط.
المقادير:
نص كيلو دقيق
ربع كوب زيت
نص معلقة صغيرة ملح
نص معلقة صغيرة سكر
كوب ونص ماء
ورقة زبدة
جبنة
بقدونس
دي المقادير سهلة وبسيطة وممكن تحشيها زي ما انتي عايزة ممكن لحمة مفرومة او فراخ وممكن خضار اللي تحبيه ، دلوقتي بقي هندخل علي طريقة عمل عجينة السمبوسة المقلية زي الجاهزة بالضبط ، امشي معايا بالخطوات واحدة واحدة وانتي هتلاقيها سهلة وبسيطة .
طريقة التحضير:
1- تجيبي نص كيلو الدقيق وضيفي عليه ربع كوب زيت مع نص معلقة صغيرة ملح مع نص معلقة صغيرة سكر واضربيهم بالمضرب السلك الكهربائي.
2- وانتي بتضربي ضيفي عليهم من كوب الي كوب ونص ماء من الحنفية وكملي عجن بالمضرب .
ملحوظة : متضيفيش كوب ونص الماء مرة واحدة ولكن ضيفي علي حسب الحاجة عشان العجينة متبوظش منك.
3- خلي العجينة ترتاح حوالي نص ساعة وغطيها بكيس.
ملحوظة: العجينة دي طبيعتها قاسية فمتقلقيش لانك اول متسيبيها ترتاح شوية هتطري لوحدها.
 |
| طريقة عمل عجينة السمبوسة في البيت زي الجاهزة بالضبط |
4- حطيها علي الرخامة وافرديها علي شكل صباع فينو وبعدين قطعيها بالسكينة علي شكل كور متساوية.
5- رشي زيت علي الرخامة وخدي اول كورة وافرديها بشكل مستطيل علي قد الصينية بالنشابة بعد متفرديها رشي علي جنب علي الرخامة شوية دقيق وتحطي عليه الكورة اللي فردتيها علي شكل مستطيل وبعدين رشي علي وشها رشة دقيق.
6- تاخدي الكورة الثانية واعمليها بنفس الطريقة اللي فاتت وترشي علي وشها دقيق وهكذا لغاية لما الكمية تخلص معاكي.
7- جيبي الكمية المفرودة كلها وبططيها بايدك وبعدين امشي عليها بالنشابة شوية بحيث تكون بنفس حجم صينية الفرن.
8- هاتي ورقة الزبدة وحطيها في الصينية وادهنيها بزيت وبعدين حطي عليها العجينة المفرودة.
9- دخليها الفرن علي درجة حرارة 180 درجة ولما تخرج من الفرن قطعيها وهي سخنة علي طول وبعدين استني عليها لما تهدي لمدة 10 دقايق وبعدين فكيها من بعض.
10- ممكن تحشيها جبنة النوع اللي تحبيه ومعاه رشة بقدونس ، وممكن تحشيها لحمة مفرومة ، وومكن فراخ او خضار اي نوع حشو انتي تحبيه.
11- حطي فيها الحشوة واقليها في زيت غزير.
ملحوظة: ممكن العجينة بعد ما تخرج من الفرن تقطعيها وتحطيها في اكياس وتشيليها في الفريزر عند الاستخدام بتخرجيها وبتستني عليها لما تفك وبعدين تقليها.
دي كانت وصفتنا النهاردة طريقة عمل عجينة السمبوسة المقلية زي الجاهزة بالضبط ، وصفة سهلة وجميلة بدل متشتريها من برة ومكوناتها بسيطة جدا ، يارب تكون عجبتكم ، واستنوني مع الذ واحلي الوصفات والاكلات وكل ما يهمك ويهم بيتك.
موضوع :
100 من 100 | 100 تقييم من المستخدمين 100 من أراء الزوار
100 من 100 | 100 تقييم من المستخدمين 100 من أراء الزوار