الذ تتبيلة فراخ بالخلطة السرية لاحلي ست بيت مصرية🍗🍗🐔🐔
 |
| فراخ بالتتبيلة السرية |
النهاردة بقي هنعمل مع بعض احلي والذ تتبيلة فراخ بالخلطة السرية لاحلي ست بيت مصرية، والطعم حكاااااية انا جربتها واكتر من مرة وعجبت جوزي جدا ان شاء الله انتي كمان تجربيها وتعجب اسرتك كلها ياقمراية.
طبعا قبل ما ندخل علي المقادير احنا كلنا عارفين ان بعد الفرخة ما تغسليها بتنقعيها يوم او يومين في محلول الملح او محلول النقع وهفكرك بيه.
فوائد محلول الملح او محلول النقع:
مكونات سائل الملح او سائل النقع(المحلول الملحي):
3 ونص لتر ماء
ثلاث أرباع كوب سكر(كوب إلا ربع)
نصف كوب ملح
طبعا طريقة تحضيرة واستخدامه سهلة جدا ، ضيفي السكر والملح للماء وذوبيهم كويس وخلي بالك المكونات تكون مضبوطة عشان ميأثرش علي الطعم سواء إنه يكون مالح او محلي،طبعا بتستخدمي محلول النقع مع اللحوم وكل أنواع الطيور والأرانب وكل ما الكمية زادت منك زودي المحلول الملحي ، بتنقعي الطيور أو اللحوم أو الارانب يوم أو يومين وهتشوفي النتيجة بنفسك، طبعا احنا هنستخدم محلول النقع علشان هنعمل النهاردة الذ تتبيلة فراخ بالخلطة السرية لاحلي ست بيت مصرية ،دلوقتي بقي هندخل علي مقادير وصفتنا الجميلة.
المقادير:
فرخة متقطعة
علبة زبادي
2 معلقة كبار صلصة
بصلة كبيرة مفرومة
5 فصوص ثوم مفرومين
بهارات
ملح
فلفل اسود
معلقة سمنة
طريقة التحضير:
1- بعد ما نقعتي فرختك يوم او يومين في محلول النقع ، هتعملي فتحات صغيرة في الفرخة بالسكينة عشان الخلطة تدخل جواها وتبقي طعمها متنكه بالخطلة الجميلة بتاعتك.
2- في بولة هتحطي الفرخة ومعاها الزبادي و2 معلقة صلصة وبصلة كبيرة مفرومة و5 فصوص ثوم والبهارات والملح والفلفل الاسود وتدعكي بيهم الفرخة بأيدك كويس جدا عشان التتبيلة تدخل جوه الفرخة.
3- هتسيبيها في التتبيلة حوالي 4 ساعات وياسلااااام بقي لو يوم كامل مش هقولك طعمها هيبقي ازاي ، انا عن نفسي بسيبها يوم كامل.
4- في حلة هتضيفي معلقة سمنة وتسيبيها تسخن جدا وبعدين تضيفي عليها الفرخة بكل التتبيلة بتاعتك ولازم تسمعي صوت الطشة.
5- تخلي الفرخة تاخد لون ذهبي وبعدين تقلبيها عشان تاخد نفس اللون الذهبي الجميل.
6- هتجيبي صينية تكفي الفرخة وتحطي فيها رشة زيت خفيفة اوي وتصبي فيها الفرخة بالتتبيلة كلها وتدخليها الفرن.
7- ممكن تشغلي الشواية في الاخر خالص عشان تاخد شكل التحمير.
ملحوظة : لو مش هتحطي الفرخة في الفرن هتخليها تاخد من الجنبين لون التحمير مش اللون الذهبي وبعدين هتهدي النار خالص وتسيبيها تستوي علي نار هادية هتبقي جميلة جدا برده.
انا كده ياقمرات خلصت وصفتي النهاردة وهي الذ تتبيلة فراخ بالخلطة السرية لاحلي ست بيت مصرية ، انا متأكده انها هتعجبكم جدا ، ومتنسونيش بالدعاء، وشوفوا بقيت وصفاتي ، واستنوني مع الذ واحلي الوصفات وكل ما يهمك ويهم بيتك💘💘💗💗
موضوع :
100 من 100 | 100 تقييم من المستخدمين 100 من أراء الزوار
100 من 100 | 100 تقييم من المستخدمين 100 من أراء الزوار