ازاي تعملي كفتة الحاتي في البيت ولا اجدعها كبابجي

ازاي تعملي كفتة الحاتي في البيت ولا اجدعها كبابجي 🍢🍢🍡🍡

اهلا بيكم، النهاردة هقدم ليكم ازاي تعملي كفتة الحاتي في البيت ولا اجدعها كبابجي، بكل اسرار وتركات مطاعم الكباب وهتبقي عملاها في البيت وضمنا اللحمة وعارفة انتي جيبها منين، غير ان الطعم هيفرق معاكي جدا هيكون طعمها اجمل وعن تجربة.

المقادير:

750 جرام لحمة مفرومة

250 جرام دهن مفروم يفضل يكون ليه ضاني ( دوش )

2 بصلة مفرومة ناعم

قرن فلفل حامي

بقدونس

رشة فلفل اسود

رشة ثوم بودر

رشة ملح

معلقة صغيرة سكر

ربع ملعقة كربوناتوا ( بيكنج صودا )

المكونات سهلة وبسيطة جدا ولسه هعلمك ازاي تعملي كفتة الحاتي في البيت ولا اجدعها كبابجي بكل التركات والحركات اللي هتخليها ناجحة معاكي وزي بتاعت المطاعم.

طريقة التحضير:

1- تضيفي علي البصلتين المفرومين شوية ملح وتسيبيها في مصفا وبعدين ادعكيها بأيدك عشان تنزلي منها ماء البصل وديه هنحتاجها بعدين ومهمة جدا.

2- ضيفي البصل واللحمة المفرومة مع الدهن المفروم وقرن الفلفل المقطع ناعم والبقدونس المفروم ورشة الثوم والفلفل الاسود والملح ومعلقة السكر ودي سر من اسرار ازاي تعملي كفتة الحاتي في البيت ولا اجدعها كبابجي ،وربع معلقة بيكربوناتوا الصوديوم، وتقلبي كويس اوي لحد ما تحصلي علي قوام متجانس.

3- دخليها الثلاجة علي الاقل لمدة ساعة لو اكتر هيبقي احسن عشان تشمع وتمسك في بعض عشان لما تيجي تصبعيها متفكش منك.

4- طلعيها من الثلاجة وصبعيها وانتي بتصبعيها بلي ايدك بماء البصل عشان متلزقش وكمان عشان متفكش منك واهم حاجة وهي علي الشواية قلبيها باستمرار عشان متفكش منك وتتشوي من كل الجوانب.

شوية ملاحظات هتتعلمي منها ازاي تعملي كفتة الحاتي في البيت ولا اجدعها كبابجي:

1- ضيفي معلقة من السكر هتديكي طعم وملمس للكفتة جميل.

2- متكتريش في التوابل لان اللحمة بلدي والدهن المفروم اللي فيها مديها طعم جميل واحنا مش عايزين نغطي علي الطعم ده بالتوابل الكتير.

وصفتنا النهاردة خلصت واكيد انتي عرفتي ازاي تعملي كفتة الحااتي في البيت ولا اجدعها كبابجي، يارب تكون الوصفة عجبتكم ومتنسوش تشوفوا بقيت وصفاتي ، واستنوني مع الذ واحلي الوصفات والاكلات وكل ما يهمك ويهم بيتك💘💘💗💗