فراخ روستو بطريقة عصرية وجديدة وطعمها حكاية😋😋😋😋
 |
| فراخ روستو مشوية |
المقادير:
دجاجة كاملة صحيحة
راس ثوم صحيح
ليمونة كبيرة
3 معالق كبيرة زبدة طرية
زيت نباتي
ورق لاوري
جوزة الطيب
ملح
فلفل اسود
بهارات
طريقة تحضير احلي فراخ روستو هتاكليها في حياتك:
1- لازم تكون الفرخة جافة تماماً من الماء عشان تقدري تفردي عليها الزبدة طبعا ممكن تنشفيها بفوطة نظيفة بس الأفضل إنك بعد متغسليها تحطيها في مصفاة وتحطيها في الشباك أو البلكونة وهي بمجرد متتعرض للهواء هتنشف علي طول.
2- حاولي تفصلي جلد الفرخة عن لحمها بس اهم حاجه وانتي بتفصلي جلد الفرخه عن لحمها تخلي بالك عشان ميتقطعش أو يتشال خالص.
3- تحضري الزبدة الطرية وتضيفي عليها الملح والفلفل الأسود وجوزة الطيب والبهارات وتعجنيها كويس.
4- تدخلي الزبدة اللي عجنتيها بالتوابل تحت الجلد وجوه الفرخة طبعا مش شرط انك تدخليها جامد جوه الفرخة لو مقدرتيش لإن الزبدة لما هتسيح هتوزع نفسها جوه الفرخة كويس.
5- بعد ما وزعتي الزبدة تحت الجلد وجوه الفرخه هتدعكي الفرخة من بره كويس أوي بالزبده بين الوراك وبين الأجنحة.
6- قشري راس الثوم وحطيه كامل جوه الفرخة وإقسمي الليمونة وحطيها برده جوه الفرخة.
7- اقفلي رجل الفرخة واحسن طريقة للقفل انك تكتفيها وأربطيها بعد كده بخيط وحطي جناحين الفرخة تحتيها.
8- رشي ملح وفلفل اسود وبهارات علي الفرخة من فوق كويس عشان الجلد يقرمش ويبقي سبايسي وكمان عشان يشد الرطوبة.
9- هتجيبي صينية وتحطي فيها شوية زيت نباتي وده طبعا عشان الفرخة متتحرقش منك من تحت.
10- تحطيها في الفرن علي درجة حرارة 220 وتسيبيها ساعة إلا ربع أو ساعة بالكتير وتشغلي مروحة الفرن عشان الحرارة تتوزع علي الفرخة كلها وطبعا لو احتاجت في الاخر الشواية ولعيها عشان تديها وش محمر وجميل .
ملحوظة: ممكن تقدمي مع احلي فراخ روستو هتاكليها في حياتك أرز أبيض أو أرز محمر هيبقي تحفي وبالهنا والشفا ياقمراية.
انا كده قدمتلكم النهارده احلي فراخ روستو هتاكليها في حياتك وبجد هتدعيلي لإن طعمها حكاية وعن تجربة واستنوني مع احلي الاكلات والوصفات وكل حاجة تخص البيت😋.
موضوع :
100 من 100 | 100 تقييم من المستخدمين 100 من أراء الزوار
100 من 100 | 100 تقييم من المستخدمين 100 من أراء الزوار