نصائح في اسرار الطبخ للمبتدئات هتخليكي بريمو في المطبخ

اهم اسرار الطبخ والمطبخ للمبتدئات🍗🍖🍕🍔

اهلا بيكم، النهاردة ياحلوين هقدم ليكم نصائح في اسرار الطبخ للمبتدئات هتخليكي بريمو في المطبخ، من فينا في بداية دخولها المطبخ محرقتش اكله وقالت لنفسها انها عمرها مهتتعلم او الموضوع صعب عليا وطبعا لو هتعتمدي علي الوصفات المكتوبة هتبقي عايزة تكرريها كذا مره عشان تطلع ناجحة معاكي اما بقي الاسرار والتركات اللي ماما بتقولهالنا وطبعا الناس الخبرة في المطبخ متتعوضش هي اللي هتخليكي اشطر شيف في مطبخ بيتك.

هبتدي معاكي دلوقتي نصائح في اسرار الطبخ للمبتدئات هتخليكي بريمو في المطبخ والنصائح دي هي اللي هتخليكي محترفة في مطبخك واكلك هيكون له نكهة خاصة بتتميز عن اي حد.

اسرار الطبخ الناجح:

من اهم نصائح في اسرار الطبخ للمبتدئات هتخليكي بريمو في المطبخ واللي بيتحتاجها معظم البنوتات في المطبخ انك تعرفي شوية حاجات بسيطة هي فعلا بسيطة جدا بس لما تطبقيها في مطبخك هتخلي اكلك له طعم تاني.
1- لما تيجي تسلقي اللحمة او الفراخ حطي معلقة سمنة كبيرة وخليها تسخن كويس اوي علي النار اول متسخن حطي اللحمة او الفراخ ولازم تسمعي صوت الطشة بتاعت الفراخ او اللحمة احنا بنسميها في المطبخ تاخد الصدمة ليه بقي ياقمراية ؟ عشان البكتريا اللي فيها تتقتل لانها مش بتتقتل بالغسيل بتتقتل بالصدمة الحرارية وكمان لما بتحطي الفرخة او اللحمة في الزيت او السمنة السخنة وتسمعي الطشة مسام الفرخة بتتقفل وبتحتفظ بالعصارة جواها وبتفضل محافظة علي طراوتها من جوه واللحوم نفس الشئ طبعا.

2- لما تيجي تسلقي اللحوم او الفراخ حطي معاها جزر مقطع واعواد كرفس و3 فصوص ثوم صاحي وتوابل زي فلفل اسود مثلا صاحي ده لو عايزه الشوربة تفضل صفرا ومتنسيش طبعا ورق اللوري.

3- لما تسلقي اللحمة او الفراخ بلاش تحطي ماء بارد اول متاخد الصدمة ولونها يتغير ضيفي ماء مغلي هتبقي تحفة .

4- لما تيجي تحمري البصل حطي شوية ملح هيخليها تحمر بسرعة وتنزل الميا اللي جواها.

5- وانتي بتعملي الكفتة المشوية عشان تلينيها وكمان متسودش منك كتري من البصل الناعم.

6- لما تيجي تعملي محشي الكوسا او الباذنجان متحطيش الملح الا لما يغلوا علشان متتهريش منك.

7- لما تيجي تعملي طاجن البامية هقولك علي تركاية حلوة اوي😋 حمري شوية ثوم مفرومين بقليل من زيت الزيتون وبعدين ضيفي ليهم شوية بقدونس وكزبرة مفرومة بعدين تحطي البامية في الطاجن او الصينية بتاعتك وتضيفي عليها الخلطة اللي عملناها من غير متحركيها وغطيها بقي بورق الالمونيوم ودخليها الفرن.

8- لما تيجي تحشي الفرخة كتري من البصل الاخضر والكزبرة الخضرة وعشان تديها نكهة طعمة ضيفي ليها شوية من الفلفل الاخضر والجزر.

9- عشان تدي للبسبوسة طعم لذيذ ضفي قليل من القشطة.

10- وانتي بتعملي البشاميل ضيفي 2 بيضة مع 3 قطع جبنة مثلثات وهتشوفي البشاميل هيبقي طعمه خطير ازاي.

11- لما تيجي تعملي المكرونة البشاميل ضيفي علي وش الصينية كباية جبنة رومي مبشورة .

12- لما تيجي تعملي السمبوسة متضيفيش الخضار الا لما اللحمة المفرومة تستوي اطفي علي اللحمة وضيفي الخضار بعد كده.

13- لما تيجي تقلي البطاطس بعد متقطعيها وتغسليها ضيفي كمون مطحون وحطيها في الفريزر 10 دقايق او ربع ساعة وبعدين اقليها في زيت حار طعمها حكاية.

14- لما تعملي الملوخية او البامية ضيفي ليها نصف ملعقة صغيرة من بيكربونات الصوديوم هتخليها خضرا ومتماسكة.

15- لما تعملي الملوخية الخضرا ضيفي ملعقة صغيرة سكر وهتبقي الملوخية مسكرة وطعمها حلو اوي.

16- طبعا تسوية الارز من اكتر الاكلات اللي المبتدئات مبتعرفش تظبطها هقولك علي كام نصيحة مهمة جدا ودي من اهم نصائح في اسرار الطبخ للمبتدئات هتخليكي بريمو في المطبخ، عشان تقيسي ماء الارز ويكون مضبوط وقفي المعلقة في النص لو وقفت يبقي الارز مائه مضبوط ولو مالت يبقي الماء زايد، وعشان تعملي ارز مفلفل ضيفي القليل من ملح الليمون هيطلع معاكي حكاية.

17- ضيفي معلقة من الخل في زيت القلي لان الخل يقلل من امتصاص الاكل للزيت.

18- علشان السلطة لونها ميتغيرش معاكي ويذبل ضيفي الملح عند تقديم السلطة.

19- لما تسوي ورق العنب متكشفيش غطاء الحلة عنه الا لما يبرد عشان لونه ميتغيرش وينشف.

20- لما تسوي البامية سيبيها علي النار لحد ما تغلي وبعدين هدي النار وسيبيها تستوي علي نار هادئة عشان متسودش كمان اعصري عليها اثناء التسوية نصف ليمونة عشان متفكش من بعضها.

21- اذا زاد منك الملح في الطعام ضيفي بطاطس او بصل مقطع لانهم بيساعدوا علي امتصاص الملح وفي الاخر ابقي شيليهم.