ازاي تعملي الشوريك المصري زي المحلات بالضبظ

ازاي تعملي الشوريك المصري زي المحلات بالضبط 🍪 🍪

اهلا بيكم، النهاردة ياقمرات هوريكي ازاي تعملي الشوريك المصري زي المحلات بالضبظ، والشوريك يا حبايبي من المعجنات المصرية المشهورة وبصراحة بتفكرني بأيام المدرسة لما كنت بشتريه بمصروفي وبيكون مرشوش عليه سكر يسلاااااام، احنا بقي هنعمل النهارده الشوريك ابو سكر اللذيذ وان شاء الله الوصفة تعجبكم.

المقادير:

750 جرام دقيق وممكن كيلو

ملعقة كبيرة خميرة

3 بيضات

كوب حليب

نصف كوب سمن

نصف كوب سكر

ملعقة صغيرة ملح

ملعقة صغيرة فانيليا

دي المقادير بتاعتنا بالتفصيل ولازم تلتزمي بالمقادير عشان العجينة تطلع معاكي مضبوطة، دلوقتي هنبتدي نتعلم ازاي تعملي الشوريك المصري زي المحلات بالضبظ.

طريقة التحضير:

1- هتحطي اللبن في حلة ومعاه السكر والسمن وتخليهم يدفوا علي النار، يدفوا بس مش عايزاهم ساقعين ولا سخنين.

2- جانباً تحطي علي الدقيق الملح والخميرة ويفضل أن تكون الخميرة فورية وبالمضرب السلك العادي تقلبي المكونات دي عشان الخميرة تتخلط مع الدقيق والملح.

3- في المضرب السلك الكهربائي هتحطي الخطاف بيدي نتيجة حلوة في العجن ونحط المكونات الجافة كلها فيه اللي هي الدقيق والملح والخميرة اللي لخبطيهم مع بعض.

4- جانباً هتضربي البيض بمعلقة مع الفانيليا وتضيفيه علي خليط اللبن والسكر والسمن وتقلبي عشان السخونة تخرج من اللبن.

5- تضيفي المكونات السائلة علي المكونات الجافة في مضرب السلك الكهربائي وتخليهم يتعجنوا في العجان، هي بتاخد فترة كبيرة في العجن يعني ممكن تخليها تتعجن حوالي 10 دقائق.

6- لو احتاجت منك العجينة ماء اثناء العجن وكانت العجينة قاسية هتضيفي ماء دافئ واذا احتاجت دقيق هتضيفي دقيق ولازم تبقي عاملة حسابك بدقيق زيادة عند الحاجة.

7- بتاخدي العجينة بتاعتك وبتحطيها في بولة وتغطيها بسترتش أو بكيس وتخليها تتخمر لغاية ما حجمها يتضاعف.

ملحوظة : لو معندكيش مكان دافئ للتخمير ممكن تولعي الفرن يدفئ بس وبعدين تطفيه وتحطي العجينة تتخمر جوه الفرن.

8- تحطي العجينة علي الرخامة وتبططيها خفيف وتخليها دائرة سميكة وتقطعيها 3 شرائط بالسكينة وممكن اربعة علي حسب حجم العجينة، تاخدي أول شريط وتبرميه وتخليه طويل ورفيع وبعدين تتنية بالتساوي وتضفري ضفيره ثنائية وتحطيه في الصينية وهكذا.

9- بعد متخلصي تضفير العجين وممكن طبعا تعملي اشكال تانية علي حسب رغبتك ، بتدهني الوش ببيضة مخفوقة مع لبن وبعدين بترشي سكر خشن ولو حابة ترشي قرفة تمام هتبقي حلوة برده.

10- تدخليها الفرن وتخلي بالك لإنها مش بتاخد وقت طويل ، بتظبطي الفرن علي درجة حرارة 220 وتشغلي المروحة عشان توزيع الحرارة جوه الفرن وعشان تستوي من كل الجهات.

شوريك مصري بالسكر

ملحوظة : ☝ ممكن تاخدي جزء من العجينة وتعملي ضفيرة طويلة ثنائية وتجهزي صينية مدهونه وتحطيها فيها هتديكي شكل حلو او هيبق بحجم الصينية كلها.

☝ هقولك علي شكل تاني حلو اوي، بتجيبي العجينة وبتفرديها بالنشابة علي شكل مستطيل وترقيها كويس جدا وبعدين تجيبي معلقة زبدة وتدهني بيها وش المستطيل عشان الحشو يلزق عليه، ممكن اي حشوه مربي أو سكرخشن وقرفة وترشي كويس اوي متسبيش حتة الا لما ترشي فيها حتي الحوافي.

هتيجي من عند الطرف الطويل في المستطيل وتبرميه وبالسكينة تقطعيه بالطول من المنتصف هتلاقيها بقيت معاكي راقات تخلي النصين جمب بعض ويكونوا متساويين وتبتدي تعمليهم ضفيرة وتعملي دائرة وتخليها جمب بعض زي الوردة متخليش اي فراغات في النصف، اخر خطوه هتدهني وشها باللبن والبيض وترشي سكر خشن وتدخليها الفرن.

وممكن انتي تبتكري الاشكال اللي انتي عايزاها جربيها وهتطلع معاكي حلوه اوي وركزي وانتي بتتعلمي ازاي تعملي الشوريك المصري زي المحلات بالضبظ وهتلاقي العجينة طلعت ناجحة معاكي وحجمها تضاعف.