ازاي تبتدي تأكلي طفلك بطريقة صحيحة وانتي مطمنة 👶👶👶
 |
| ازاي تبتدي تأكلي طفلك بطريقة صحيحة وانتي مطمنة |
اهلا بيكم، النهاردة هنتكلم عن ازاي تبتدي تأكلي طفلك بطريقة صحيحة وانتي مطمنة والموضوع ده مهم جدا، لان كتير مننا بيسألو ، امتي طفلي يأكل، وايه الأكل اللي المفروض يأكله ويفيده ويمده بالعناصر اللي هو محتاجها، كل دي اسئلة بتدور في ذهن الأم وبتبقي محتاجة إجابة عليها خصوصا الأم مع طفلها الأول.
خلينا نتفق من البداية إن كل الأبحاث العلمية أثبتت إن الطفل المفروض نبتدي ندخله الطعام مع الرضاعة في عمر الست شهور ولكن مش اي طعام لازم تعرفي ازاي تبتدي تأكلي طفلك بطريقة صحيحة وانتي مطمنة ومن اكتر الاخطاء اللي الأم بتعملها إنها بدخل علي الطفل بروتين غريب زي الزبادي والبسكويت وده غلط المفروض ان الام تبدء بالخضروات زي البطاطس والكوسا والجزر المسلوقين بماء فقط طبعا انا هوريكي ازاي تعملي الاكلات دي بالتفصيل اما الزبادي والبسكويت ممكن طفلك يأكلهم من عمر 7 شهور.
طبعا انتي بتدي طفلك طعامه بالتدريج يعني بتبدئي بكميات قليلة جدا والموضوع محتاج صبر واعادة المحاولة اكثر من مرة ومتيأسيش لو طفلك رفض الطعام لانه بالنسباله شئ غريب عليه.
هقولك علي شوية نصائح هتعرفي عن طريقها ازاي تبتدي تأكلي طفلك بطريقة صحيحة وانتي مطمنة.
اهم النصائح عند بدء اطعام طفلك:
1- اختاري الطعام الناعم سهل البلع وبالتدريج ابتدي دخلي الأكل الاكثر خشونة.
2- لا تتضيفي اي ملح أو سكر لأكل طفلك في المرحلة الاولي ولكن ضفيهم بالتدريج ، وابتدي اضبطي الملح والسكر في أكله بشكل كامل في عمر السنة.
3- لما تبتدي تأكلي طفلك ابتدي معاه بكمية بسيطة جدا مقدار نصف معلقة وبعدين تزودي بالتدريج معلقتين وهكذا.
4- متأكليش طفلك كل يوم صنف مختلف ولكن استمري من 3 الي 5 ايام علي صنف واحد عشان تعرفي ايه المناسب لجسمه وايه اللي ممكن يعمله حساسية للطفل واللي مش شرط تبقي علي هيئة طفح جلدي ممكن تكون في صورة اسهال أو مغص أو صعوبة في التبرز.
5- حاولي تقدمي لطفلك الاكل بمعلقة عشان يتعود علي الطريقة دي بدل متأكليه بايدك وعشان كمان سلامت صحته.
6- الوجبات اللي طفلك هيبتدي بيها في عمر الست شهور وجبتين فقط.
7- طبعا كلنا عارفين ان من الممنوعات انك تشربي طفلك لبن بقري وعسل قبل ميكمل عمر السنة.
8- من اكبر الحاجات اللي الأم بتعملها وبتبقي مخطئه فيها انها بتشرب طفلها ماء من اول ميتولد وده اكبر غلط ، المفروض انك تبدئي تشربيه ماء مع بداية اكله يعني في عمر الست شهور، قبل كده لا لان لبن الام فيه اللي بيعوض الماء.
دي شوية نصائح كده علي الماشي عشان تعرفي بيها ازاي تبتدي تأكلي طفلك بطريقة صحيحة وانتي مطمنة، دلوقتي هنتكلم عن الاطعمة اللي طفلك المفروض ياكلها.
البطاطس المسلوقة :
بتتسلق بماء فقط ومش بتحطي اي ملح، اول مبتتسلق بتهرسيها ، ومتنسيش تأكلي طفلك بالمعلقة عشان يتعود عليها.
الكوسا وفوائدها الجميلة للطفل:
طبعا الكوسا من الخضروات ذات القيمة الغذائية العالية ووصانا بتناولها رسولنا الكريم، لان الكوسا فيها نسبة الياف وبروتينات وكربوهيدرات ونسبة سكر، علشان كدة بنقول ديماً اكلي طفلك كوسا، ممكن تبدئي تقدمي لطفلك كوسا في عمر 8 شهور قبل كده ممكن يكون صعب علي طفلك تناول قشرتها، عشان كده لما تيجي تشتريها نقي الكوسا الصغيرة والرفيعة بتكون قشرتها ناعمة، طبعا هتقدمي الكوسا لطفلك مسلوقة بماء فقط ومضفيش ملح نهائي.
الجزر:
الجزر من الاطعمة المهمة للطفل لانه طبعا كله الياف ومعادن وبقوي النظر، وعشان تأكليه لطفلك قدميه مهروس بس وانتي بتسلقيه قطعيه شرائح ومضفيش ملح، اول ما طفلك يكمل سنة ممكن يأكله نيئ هيكون سهل عليه لانه هيكون عنده اسنان مش هتحتاجي تسلقيه.
الموز:
الموز من اهم الاطعمة المفيدة للطفل ، وده لانه يحتوي علي مادة البكتين، ودي مادة قابضة بتساعد في التخلص من حالات الاسهال ، ده غير انه سهل البلع ، بتقدميه لطفلك انك تهرسيه بشوكة، وبتأكليه بالمعلقة.
كبد الدجاج:
طعام مهم جدا لانه يحتوي علي عنصري الحديد والبروتين، بتبتدي تأكليها لطفلك لما يكمل 8 او تسع شهور، بتسلقيها وبتهرسيها ومضفيش ملح.
شوربة الخضار:
بتضيفي فيها البطاطس والكوسا والجزر وبتتسلق وتضرب في الخلاط ، بتأكليها لطفلك بالملعقة ولكن بكميات قليلة في الاول.
الارز:
بتسلقيه وتأكليه لطفلك من غير اضافة ملح ، وممكن كمان تشربيه ماء السلق في الببرونة.
عصير البرتقال:
وده طبعا من اهم الحاجات اللي لازم تعرفي بيها ازاي تبتدي تأكلي طفلك بطريقة صحيحة وانتي مطمنة ، لانه بيحتوي علي فيتامين سي المفيد لصحة طفلك.
 |
| عصر البرتقال مع الجزر لطفلك |
صفار البيض:
ممكن تأكليها لطفلك في عمر 7 شهور ، بتسلقه وبتهرسي صفار البيضة.
كده يا أحلي أمهات في الدنيا احنا خلصنا موضوعنا النهاردة عن ازاي تبتدي تأكلي طفلك بطريقة صحيحة وانتي مطمنة ، يارب يكون الموضوع افادكم وعجبكم ، ومتنسوش تتابعوا بقيت وصفاتي ، واستنوني مع الذ وأحلي الأكلات وكل ما يهم البيت ❤❤💖💖
موضوع :
100 من 100 | 100 تقييم من المستخدمين 100 من أراء الزوار
100 من 100 | 100 تقييم من المستخدمين 100 من أراء الزوار